Şoreşa Rojava ya ku bi bedelên giranbiha ve navê xwe li rûpelên dîroka mirovahiyê nivîsand, bi cengên xwe yên giran ve, bi destanên qehremanên xwe ve, bû şoreşa tevahî Kurdistan û cîhanê. Di nava van deh salên şoreşê de bi hezaran ciwanên Kurd beşdarî nava refên şoreşa azadiyê bûn û li hemberî hêzên çete û dagirker canê xwe kirin mertal. Tevahî cîhanê şahidî ji lehengiya şervanên YPJ û YPG’ê re kirin. Şahidî ji lehengiya Arîn, Îlan û Gelhat’an re kir. Her şervan û fermandarek YPG bê teredut, bi wêrekiyeke mezin destûr nedan ku hêzên çete û dagirker destê xwe dirêjî gelê Rojava û Bakur û Rojhilatê Sûriyê bikin. Gav bi gav ev xakên pîroz ji çeteyên DAIŞ’ê rizgar kirin.
Yek ji van lehengan jî rêhevalê me Rûbar Erzîncan bû. Hevalê Rûbar ku bi fikr û felsefeya Rêber APO ya netewa demokratîk dil û mejiyê xwe ava kiribû, di kêliyên herî giran ên cenga Rojava de ji Bakurê Kurdistanê berê xwe da Rojavayê Kurdistanê û li hemberî hêzên çete parastina gelên herêmê kir. Heval Rûbar bi dilnizmî û fedekariya xwe ve, kete dilê gel û rêhevalên xwe. Ji hêzên dagirker û faşîst re nîşan da ku gelên Kurdistanê di ruh û mejiyê xwe de sînorên dagirkeriyê rakirine û bûne yek dil û yek ruh.
Di salên dawî yên tekoşîna xwe de, hevalê me Rûbar bi nexweşiya penceşêrê ket û li gor şert û mercên şoreşê hem tedawiya xwe didît, hem jî kar û xebatên xwe dida meşandin. Tevî ku nexweşiya xwe pir giran bû, lê hevalê Rûbar bi heman coş û moralê, bi biryardariyek hê xurttir xwe beşdarî nava kar û xebatên şoreşê dikir. Bi vî rengî hevalê me Rûbar di dîroka 23 Puşperê de tevlê nava refên şehîdan bû.
Jiyan û tekoşîna hevrêyê me Rûbar û destana lehengiya bi hezaran şehîdên me, ji bo me fermana bilindkirina şerê gelê şoreşgerî dide. Divê em û gelê xwe mil bi mil li hemberî gefên dijmin, li hemberî êrîşên hovane yên dewleta Tirk a dagirker û çeteyên wê welatê xwe û destkeftiyên şoreşê biparêzin. Encax em bi vê sekn û helwesta xwe bibin layîqê şehîdan û siberojeke azad û bi aram diyarî gelê herêmê bikin.
Nasnameya hevalê me yê şehîd wiha ye;
Nasnav: Rûbar Erzîncan
Nav û Paşnav: Ayhan Koç
Navê Dayik û Bav: Husniye – Binali
Cih û Dîroka Şehadetê: Hesekê- 23. 06. 2022
Navenda Ragihandina YPG | 2’yê Tîrmeha 2022
